ភ្នំពេញ៖ ក្រសួងសេដ្ឋកិច្ច និង ហិរញ្ញវត្ថុ ចុះហត្ថលេខាលើអនុស្សរណៈយោគយល់ស្តីពី “កិច្ចសហការក្នុងក្របខណ្ឌការអភិវឌ្ឍសេដ្ឋកិច្ចឌីជីថល និង បច្ចេកវិទ្យាហិរញ្ញវត្ថុនៅកម្ពុជា” ជាមួយធនាគារ ABA ដើម្បីចូលរួម លើកកម្ពស់ការអភិវឌ្ឍវិស័យសេដ្ឋកិច្ចឌីជីថល និង បច្ចេកវិទ្យាហិរញ្ញវត្ថុនៅកម្ពុជាឱ្យកាន់តែរស់រវើក និង ស្រប តាមគោលនយោបាយ និង និន្នាការជាតិ តំបន់ និង សកល។

ពិធីនេះដែរមានវត្តមានចូលរួមដោយ រដ្ឋមន្រ្តីក្រសួងសេដ្ឋកិច្ច និង ហិរញ្ញវត្ថុលោក អូន ព័ន្ធមុនីរ័ត្ន និង អគ្គលេខាធិការនៃអគ្គលេខាធិការដ្ឋានគណៈកម្មាធិការសេដ្ឋកិច្ច និង ធុរកិច្ចឌីជីថល លោក គង់ ម៉ារី រួមទាំងនាយកប្រតិបត្តិធនាគារABA លោក Askhat Azhikhanov ព្រមទាំងតំណាងសមាគមពាក់ព័ន្ធ នាថ្ងៃទី២៦ ខែមេសា ឆ្នាំ២០២៣ នៅទីស្តីការក្រសួងសេដ្ឋកិច្ច និង ហិរញ្ញវត្ថុ។

ការចុះអនុស្សរណៈនៃការយោគយល់នេះនឹងជំរុញ និង ពង្រីកកិច្ចសហការកាន់តែល្អ ប្រសើរដូចជា ការចែករំលែកចំណេះដឹង បទពិសោធន៍ និង ការបណ្ដុះបណ្ដាល, ការចូលរួមប្រើប្រាស់ថ្នាលឌីជីថលគន្លឹះ និង ការគាំទ្រលើសកម្មភាព និង កម្មវិធីផ្សេៗទៀត ទាំងផ្នែកហិរញ្ញវត្ថុ និង មិនមែនហិរញ្ញវត្ថុ សំដៅជំរុញនិង អភិវឌ្ឍសេដ្ឋកិច្ចឌីជីថល និង បច្ចេកវិទ្យាហិរញ្ញវត្ថុនៅកម្ពុជា។

គួរឱ្យដឹងដែរថា ក្រសួងសេដ្ឋកិច្ច និងហិរញ្ញវត្ថុ បញ្ជាក់ថាក្រសួងធ្លាប់បានសហការជាមួយធនាគារ ABA លើការងារមួយចំនួនរួចហើយក្នុងវិស័យឌីជីថល និង បច្ចេកវិទ្យាហិរញ្ញវត្ថុ ខណៈការចុះអនុស្សរណៈនៃការយោគយល់នាពេលនេះនឹងពង្រីកកិច្ចសហការ ក៏ដូចជាលើកកម្ពស់ការអភិវឌ្ឍវិស័យសេដ្ឋកិច្ចឌីជីថល និង បច្ចេកវិទ្យាហិរញ្ញវត្ថុនៅកម្ពុជាកាន់តែល្អប្រសើរបន្ថែមទៀត។